Configuraches os cross-sells de WooCommerce (as «vendas cruzadas») nos teus produtos e non aparecen por ningures. Case nunca é un fallo: WooCommerce móstraas nun único sitio e só se se cumpren varias condicións. Para escribir esta guía revisamos o código de WooCommerce 10.8 e probámolo nunha tenda de probas, co carriño e o checkout de bloques e cos clásicos.
Primeiro verás onde deberían saír, despois as oito causas habituais coa súa solución, e ao final como levar esas mesmas vendas cruzadas ao checkout, que é onde WooCommerce non as mostra nunca.
Onde mostra WooCommerce as vendas cruzadas
As vendas cruzadas configúranse en cada produto: na caixa «Datos do produto», lapela «Produtos relacionados», campo «Vendas cruzadas». O que poñas aí suxírese cando ese produto está no carriño.
E móstranse só na páxina do carriño:
- Carriño clásico (o do shortcode
): debaixo da táboa de produtos, co título «Pode que esteas interesado en…». Amosa dúas, escollidas ao chou entre todas as que encaixen. - Carriño de bloques (o de serie nas tendas novas desde WooCommerce 8.3): debaixo dos produtos, nunha sección «Pode que che interese…» con ata tres.
Non saen na ficha de produto (aí van as «Vendas adicionais», os upsells), nin no mini-carriño, nin no checkout. Non confundas tampouco as vendas cruzadas cos «Produtos relacionados» que ves baixo a ficha: eses escóllenos WooCommerce só, por categoría e etiquetas (e, para liar máis, a lapela onde configuras as vendas cruzadas tamén se chama «Produtos relacionados»). Se dubidas de que é cada cousa, explicámolo en order bump, upsell e cross-sell.
8 causas polas que non aparecen
1. Búscaas onde WooCommerce non as pon
É a máis habitual. Se esperas velas na ficha, no caixón do mini-carriño ou na páxina de pagamento, non van saír. Engade ao carriño un produto que teña vendas cruzadas e abre a páxina do carriño.
2. Están no produto equivocado
As vendas cruzadas póñense no produto que o cliente mete na cesta, non no que queres suxerir. Se queres que ao mercar unha cámara se suxira unha tarxeta de memoria, a tarxeta vai no campo «Vendas cruzadas» da cámara.
Comproba tamén o campo: «Vendas adicionais» e «Vendas cruzadas» están un enriba do outro, e é doado cubrir o que non é.
3. O produto suxerido xa está no carriño
WooCommerce quita das suxestións todo o que xa está na cesta, incluídas as variacións. Se probas cun carriño que xa leva a tarxeta de memoria, non a vai suxerir. Comprobámolo: con dous produtos na cesta que se suxiren entre si, ningún aparece como venda cruzada.
4. O produto suxerido non se pode ver
Só se suxiren produtos visibles na tenda. Fican fóra os que:
- Están en borrador, pendentes ou privados.
- Teñen a «Visibilidade no catálogo» en «Oculto» (na caixa «Publicar» da ficha). Probámolo: ao ocultar un dos tres produtos suxeridos, o carriño pasou a amosar só os outros dous.
- Teñen a visibilidade en «Só nos resultados de procura».
- Están esgotados e tes marcada a opción «Ocultar do inventario os produtos esgotados», en WooCommerce → Configuración → Produtos → Inventario.
5. A túa páxina de carriño non ten onde mostralas
No carriño de bloques, as vendas cruzadas son un bloque máis dentro da páxina. Se alguén o borrou, non saen. Abre Páxinas → Carriño no editor e busca, debaixo dos produtos do carriño, un bloque «Colección de produtos» coa colección «Vendas cruzadas» (en tendas máis antigas chámase «Vendas cruzadas no carriño»). Se non está, engádeo aí.
Se o teu carriño está feito cun maquetador (Elementor, Bricks, Divi…), a plantilla do carriño ten que incluír o elemento de vendas cruzadas dese maquetador. Se non o ten, WooCommerce non ten onde mostralas.
6. Un tema, un plugin ou un fragmento de código quitounas
No carriño clásico, WooCommerce móstraas enganchando a función woocommerce_cross_sell_display do gancho woocommerce_cart_collaterals. Moitos temas quítana ou móvena, e é un fragmento moi repetido en titoriais para «limpar» o carriño. Busca no functions.php do teu tema fillo e no teu plugin de fragmentos de código calquera liña con woocommerce_cross_sell_display ou co filtro woocommerce_cart_crosssell_ids.
Se non atopas nada, proba nunha copia da web (nunca na tenda en produción) a activar un tema por defecto como Storefront ou Twenty Twenty-Five. Se con el aparecen, o culpable é o teu tema.
7. Os teus clientes non pasan polo carriño
Se a maioría dos teus clientes van directos ao pagamento (co botón «Finalizar compra» do mini-carriño, cun botón de «Mercar agora» ou porque a tenda redirixe ao checkout tras engadir un produto), as vendas cruzadas poden estar ben configuradas e aínda así case ninguén as ve. Aquí non hai nada que arranxar na configuración: o problema é o lugar. Vémolo na última sección.
8. Saen menos das que esperas
Se puxeches seis vendas cruzadas e só ves dúas, non é un fallo: o carriño clásico amosa dúas ao chou e o de bloques, tres. Se queres máis, segue lendo.
Como mostrar máis de dúas
No carriño clásico, con dous filtros de WooCommerce. Engade isto cun plugin de fragmentos de código ou no functions.php do teu tema fillo:
// Amosa ata 4 vendas cruzadas no carriño clásico, en 4 columnas.
add_filter( 'woocommerce_cross_sells_total', function () { return 4; } );
add_filter( 'woocommerce_cross_sells_columns', function () { return 4; } );A orde é aleatoria por defecto. Se prefires outra, o filtro woocommerce_cross_sells_orderby acepta, por exemplo, price ou menu_order.
No carriño de bloques non fai falta código: abre a páxina do carriño no editor, selecciona o bloque de vendas cruzadas e cambia o número de produtos e de columnas no seu panel de axustes.
Por que non saen no checkout (e como levalas)
Aínda que o teñas todo ben, na páxina de pagamento non vas ver vendas cruzadas. Non é un esquecemento: a función que as mostra no carriño clásico detense de inmediato se detecta que está no checkout, e o checkout de bloques non inclúe ningún bloque de vendas cruzadas. Na nosa proba, o mesmo carriño que amosaba tres suxestións non mostrou ningunha ao pasar ao checkout, nin no de bloques nin no clásico.
Forzalas con código tampouco é boa idea. As vendas cruzadas están pensadas para o carriño: o seu botón «Engadir ao carriño» non está preparado para actualizar o total do checkout sen recargar a páxina, e unha recarga na páxina de pagamento pode borrar a dirección e os datos que o cliente xa escribira.
O que si funciona no checkout é un order bump: unha oferta que o cliente engade marcando unha casiña, que actualiza o total sen tocar o formulario. É a forma de amosar os teus complementos tamén aos clientes que se saltan o carriño (causa 7), e no momento en que xa decidiron mercar. Explicámolo en que é un order bump e como usalo en WooCommerce.
Leva as túas vendas cruzadas ao checkout
Con EHERO Woo Checkout Offers (é o noso plugin) escolles os produtos que queres ofrecer no checkout, póñeslles un prezo especial e móstralos só cando na cesta hai certos produtos ou categorías, igual que unha venda cruzada pero no momento de pagar. Sen recargar a páxina, no checkout clásico e no de bloques, e tamén no carriño e no mini-carriño. Unha licenza por dominio, 79,99 € ao ano.
Preguntas frecuentes
Que diferenza hai entre vendas cruzadas e vendas adicionais en WooCommerce?
As vendas adicionais (upsells) ofrecen unha alternativa mellor e vense na ficha do produto. As vendas cruzadas (cross-sells) suxiren complementos e vense no carriño.
Por que só me saen dúas vendas cruzadas?
Porque o carriño clásico amosa dúas ao chou. Podes subir o número co filtro woocommerce_cross_sells_total. No carriño de bloques saen ata tres e cámbiase desde o editor.
Podo mostrar as vendas cruzadas na ficha de produto?
En temas de bloques, si: o bloque «Colección de produtos» ten unha colección de vendas cruzadas que podes colocar na plantilla de produto do editor do sitio. En temas clásicos fai falta código ou un plugin.
Saen as vendas cruzadas no mini-carriño?
Non. Nin no mini-carriño clásico nin no de bloques.
As vendas cruzadas pódense poñer con desconto?
Non de serie: móstranse co seu prezo normal, ou co de rebaixa se o produto o ten. Para un prezo que só exista ao mercalo xunto con outro produto fai falta un plugin, como un de order bump.
Afecta a caché ás vendas cruzadas?
Non debería: a páxina do carriño non se cachea, porque cambia con cada cliente. Se o teu plugin de caché a está gardando, terás outros problemas máis graves que as vendas cruzadas, así que exclúea.
Conclusión
Se os teus cross-sells de WooCommerce non aparecen, repasa por orde: que os busques no carriño, que estean no produto que vai na cesta, que o suxerido non estea xa no carriño e sexa visible, que a túa páxina de carriño teña onde mostralos e que ningún tema ou fragmento os quitase. E se os teus clientes van directos ao pagamento, non te obsesiones co carriño: leva esas mesmas suxestións ao checkout cun order bump.
Guías relacionadas
- Que é un order bump e como usalo en WooCommerce: exemplos, regras e que medir.
- Order bump, upsell e cross-sell: que é cada técnica e cando usala.
- EHERO Woo Checkout Offers: o order bump para WooCommerce con prezo especial, tope de unidades e estatísticas.
