Como publicar unha app en Google Play e App Store: requisitos, pasos e prazos en 2026

Saber como publicar unha app en Google Play e en App Store importa case tanto como programala. As dúas tendas piden unha conta de desenvolvedor, unha ficha completa, varias declaracións sobre privacidade e unha revisión feita por persoas. Nada diso é difícil, pero case todo ten un prazo que non depende de ti.

Nesta guía contamos os pasos de cada tenda, o que custa, o que tarda e os requisitos de 2026 que máis frean unha primeira publicación. Os datos están comprobados nas páxinas oficiais de Google e de Apple, e o demais sae de publicar as nosas propias apps nas dúas.

A resposta curta

Publicar unha app é abrir unha conta de desenvolvedor, subir a app asinada, cubrir a ficha e as declaracións, e pasar unha revisión. Isto é o que cambia dunha tenda a outra:

O que necesitas antes de empezar

Estas cousas son comúns ás dúas tendas. Convén telas listas antes de abrir ningunha consola, porque varias tardan días.

• Decidir quen publica. Pode ser unha persoa ou unha empresa. O nome que elixas é o que verá o público como vendedor. Se publica unha empresa, as dúas tendas piden un número D-U-N-S, que é gratuíto e se solicita a Dun & Bradstreet.
• Unha política de privacidade publicada. Nunha dirección web accesible, e que diga o que a app fai de verdade cos datos.
• A app asinada. Un ficheiro AAB para Google Play e unha compilación subida desde Xcode para App Store.
• A ficha. Nome, descrición curta e longa, icona e capturas de pantalla de cada tamaño que pida a tenda.
• As declaracións. Clasificación por idades, que datos recolle a app e para que, se leva anuncios e a que público vai dirixida.
• Unha conta de proba. Se a app pide iniciar sesión, o revisor necesita un usuario e un contrasinal que funcionen.
• Unha forma de borrar a conta. Se a app deixa crear contas, as dúas tendas esixen que o usuario poida pedir o seu borrado.

Publicar en Google Play, paso a paso

1. Abre a conta de desenvolvedor. Créase en Play Console, acéptase o acordo de distribución e págase a cota de 25 dólares, que é única. Google verifica a identidade e pode pedir un documento oficial.
2. Crea a app en Play Console. Elixes o nome, o idioma principal e se é app ou xogo, gratis ou de pago.
3. Cubre «Contido da aplicación». Política de privacidade, seguridade dos datos, clasificación de contido, público obxectivo, anuncios e borrado de datos. Sen isto non se pode enviar nada a revisión.
4. Sube o AAB a unha proba. A proba interna serve para instalar a app nos teus móbiles en minutos. A proba pechada ábrea a un grupo de persoas que ti elixes.
5. Cumpre a proba pechada, se che toca. As contas persoais creadas despois do 13 de novembro de 2023 teñen que manter unha proba pechada con polo menos 12 testers apuntados durante 14 días seguidos. Só entón se pode pedir o acceso a produción, contestando unhas preguntas sobre a app e sobre como se probou.
6. Prepara a ficha da tenda. Textos, icona, imaxe de cabeceira e capturas. Pódese traducir aos idiomas que queiras.
7. Crea a versión de produción e envíaa. Elixes os países, sobes a versión e mándaa a revisión. Ao aprobarse publícase soa, salvo que actives a publicación xestionada para decidir ti o momento.

Un detalle que nos custou unha tarde: algúns erros non aparecen nas probas e si ao crear a versión de produción. Pasounos co requisito das páxinas de memoria de 16 KB, do que falamos máis abaixo. A proba interna publicouse sen avisos e o erro saíu ao final.

Publicar en App Store, paso a paso

1. Apúntate ao Apple Developer Program. Custa 99 dólares ao ano, que se cobran en moeda local. Como persoa abonda coa túa identidade; como empresa, Apple pide que sexa unha entidade legal e o seu número D-U-N-S.
2. Crea a ficha en App Store Connect. Nome, idioma principal, identificador do paquete e categoría.
3. Sube a compilación. Faise desde Xcode, nun Mac. Desde o 28 de abril de 2026, Apple só acepta apps compiladas con Xcode 26 ou posterior e o SDK de iOS 26.
4. Próbaa con TestFlight. Non é obrigatorio, pero é a forma de que outras persoas a instalen antes de publicala.
5. Completa a ficha. Capturas, descrición, palabras clave, enderezo de soporte e enderezo da política de privacidade.
6. Cubre as declaracións. Clasificación por idades, o cuestionario de privacidade da app e, para vender na Unión Europea, a declaración de se actúas como comerciante segundo a Lei de Servizos Dixitais.
7. Escribe as notas para o revisor. Que fai a app, como se entra e a conta de proba. Canto máis claro, menos voltas.
8. Envía a revisión e escolle como se publica. Podes publicala ti á man cando se aprobe, deixar que saia soa ou fixar unha data a partir da cal poida saír.

Dúas cousas que aprendemos enviando: o cuestionario de privacidade hai que publicalo, non abonda con gardalo, e as primeiras compras dentro da app teñen que enviarse a revisión xunto cunha versión: non se poden mandar soltas.

Canto tarda

A parte que depende de ti faise nun ou dous días se tes o material. A que non depende de ti é esta:

Con unha conta persoal recentemente creada en Google, conta con tres semanas como mínimo desde que tes a app ata que está en produción. E se a tenda rexeita a app, cada rolda volve sumar o seu prazo de revisión. Os motivos máis habituais están en por que rexeitan a túa app.

O que frea sen avisar

• Os 12 testers de Google. Contan os que levan 14 días seguidos apuntados. Se algún se dá de baixa a metade, deixa de contar: convén invitar a algún máis da conta.
• O nivel de API de Android. Desde o 31 de agosto de 2026, as apps novas e as actualizacións teñen que apuntar a Android 16 (nivel de API 36). Sobe cada ano.
• As páxinas de memoria de 16 KB. As apps que apuntan a Android 15 ou posterior teñen que admitilas en dispositivos de 64 bits. Só afecta ás que levan código nativo, propio ou dunha libraría, pero unha libraría antiga abonda para bloquear a publicación.
• A versión de Xcode. Apple sobe cada ano o mínimo co que hai que compilar. Un proxecto parado dous anos non se pode subir sen actualizalo antes.
• A conta de proba. Un revisor que non pode entrar, rexeita. E se a app cobra, ten que poder ver o fluxo de compra enteiro.
• O borrado de conta. Apple esíxeo dentro da propia app. Google pídeo dentro da app e, ademais, nunha dirección web.
• Os cobros. Os produtos e as subscricións danse de alta en cada tenda e pasan a súa propia revisión. Non se resolven a última tarde.

Se a app está feita con IA ou sen programar

Ás tendas dálles igual como se fixese a app. Miran o que reciben: un paquete asinado que cumpre os seus requisitos técnicos e as súas normas. Iso deixa tres casos.

• A ferramenta exporta unha app de verdade. Se che dá un AAB e un proxecto para Xcode, o camiño é o desta guía.
• A ferramenta dáche unha web. Unha web non se sobe ás tendas. Hai que envolvela nunha app, e Apple rexeita as que son só unha web dentro dunha xanela, sen nada propio do móbil.
• A app usa IA ao funcionar. As tendas preguntan por iso. Convén explicalo nas notas de revisión e prever como se denuncia un contido inadecuado.

Antes de dar o paso, paga a pena comprobar se o que necesitas é unha app ou unha web. Contámolo en app ou web: que necesita o teu negocio.

Preguntas frecuentes

Canto custa publicar unha app?

A cota de Google Play son 25 dólares, unha soa vez. A de Apple son 99 dólares ao ano. A iso súmanse o servidor e o mantemento, que explicamos en canto custa publicar e manter unha app.

Podo publicar unha app como particular?

Si, nas dúas tendas. En Google Play, as contas persoais novas teñen que pasar a proba pechada de 12 testers durante 14 días antes de publicar.

Canto tarda a revisión dunha app?

Apple revisa a metade dos envíos en menos de 24 horas e o 90 % en menos de 48. Google non dá unha cifra fixa e avisa de que nalgunhas contas pode chegar a 7 días ou máis.

Fai falta un Mac para publicar en App Store?

Para compilar e subir a app fai falta Xcode, que só funciona en Mac. Pode ser un propio, un alugado ou un servizo de compilación na nube.

Pódese publicar só nunha tenda?

Si. Se o teu público está claramente en Android ou en iPhone, empezar por unha é máis rápido e máis barato, e a outra engádese despois.

Que pasa se rexeitan a app?

Corríxese o que indica o revisor e vólvese enviar. Non hai penalización por un rexeitamento, pero cada rolda suma días.

Hai que volver pasar a revisión con cada actualización?

Si. Cada versión nova pasa revisión nas dúas tendas, aínda que adoita ser máis rápida ca a primeira.

Conclusión

Publicar unha app ten máis de trámite ca de técnica. A conta, a ficha, as declaracións e a revisión son as mesmas pezas nas dúas tendas, cunha diferenza que convén ter presente desde o primeiro día: Google pide dúas semanas de proba ás contas persoais novas e Apple pide un Mac e unha cota anual. Se preparas o material antes de empezar e contas cos prazos, a publicación deixa de ser o susto do final do proxecto.

As tendas cambian os seus requisitos cada ano. Os datos desta guía están comprobados nas súas páxinas oficiais o 9 de outubro de 2026.

Ligazóns útiles

• Apps á medida: como desenvolvemos e publicamos unha app, por fases.
• Canto custa publicar e manter unha app: cotas, comisións e gastos de cada mes.
• Canto custa facer unha app: de que depende o prezo do desenvolvemento.
• Por que rexeitan a túa app: os motivos máis habituais e como evitalos.
• Requisitos de proba para contas persoais novas, na axuda de Play Console.
• Requisitos de nivel de API, na axuda de Play Console.
• App Review e próximos requisitos, en Apple Developer.