Por que rexeitan a túa app en Google Play e App Store (e como evitalo)

Que rexeiten a túa app en Google Play ou na App Store non significa que estea mal feita. Significa que un revisor —unha persoa, non un algoritmo— atopou algo que incumpre as súas normas, e case sempre é unha de media ducia de cousas que se poden prever. Estas son as que máis nos atopamos, e como evitalas antes de mandar a app a revisión.

Primeiro, o importante: un rexeitamento non é o final

Corríxese e vólvese enviar. O que custa é o tempo: cada rolda son días, ás veces unha semana, e se tes unha data de lanzamento comprometida, tres rexeitamentos seguidos levan o mes por diante. Por iso convén enviar ben á primeira, non confiar en ir corrixindo.

Os seis motivos máis habituais

1. Permisos que non xustificas

Pedir a localización, a cámara ou os contactos sen que estea claro para que é o rexeitamento número un. As dúas tendas esixen que cada permiso teña unha razón visible para o usuario, e Apple ademais pide un texto explicativo que se mostra ao solicitalo. A solución non é escribir mellor o texto: é non pedir o que non necesitas.

2. Non hai política de privacidade, ou non di a verdade

Ten que existir, estar nunha URL accesible e coincidir co que a app fai de verdade. As dúas tendas obrígante ademais a declarar que datos recolles e para que. Se declaras que non recolles nada e logo levas un SDK de publicidade ou de analítica, vancho atopar.

3. A app non fai o suficiente

Apple é explícito nas súas normas de revisión: unha app que só mostra a túa web nunha xanela, ou que achega pouco máis ca un folleto, rexeítase. Se a túa idea é «a miña web pero en app», ese é o motivo polo que a van rexeitar, e convén sabelo antes de pagala.

4. Cobras fóra do seu sistema

Se vendes contido dixital ou subscricións que se consumen dentro da app, tes que usar o sistema de pagamento da tenda e pagar a súa comisión. Enlazar á túa web para que paguen aí é rexeitamento directo. Ollo: os bens físicos e os servizos do mundo real si poden cobrarse fóra; a fronteira é máis sutil do que parece e convén mirala caso por caso.

5. Falta información para probala

Se a app pide conta, tes que darlles unhas credenciais de proba que funcionen. Un revisor que se atopa cunha pantalla de acceso e non pode entrar, rexeita. Parece obvio e é dos motivos máis frecuentes.

6. Contido xerado por IA sen declarar

É o máis novo e onde máis xente tropeza agora. Se a túa app xera textos, imaxes ou respostas con intelixencia artificial, hai que declaralo e explicar que control hai sobre o que produce. Ocultalo non cola.

Diferenzas entre as dúas tendas

Google Play	Revisión máis rápida, ás veces horas. Moi estrito con permisos sensibles e coas declaracións de seguridade dos datos. Cada ano sobe o nivel mínimo do sistema que acepta.
App Store	Revisión máis lenta e máis humana, con criterio propio. Estrita coa utilidade da app, cos pagamentos dentro e coa privacidade. Cando rexeita, adoita explicar o motivo con precisión.
As dúas	Política de privacidade obrigatoria, declaración de datos, credenciais de proba se hai acceso, e capturas que se correspondan co que a app fai de verdade.

A lista que repasamos antes de enviar

• Cada permiso que pide a app ten unha razón visible, e os que sobran quitáronse.
• Política de privacidade publicada, accesible e coherente co que a app recolle.
• Declaracións de datos cubertas nas dúas tendas, cos SDK de terceiros incluídos.
• Credenciais de proba que funcionan, probadas desde cero ese mesmo día.
• Capturas reais da app, non montaxes con pantallas que non existen.
• Se hai cobros dentro, están feitos co sistema da tenda e verificados en servidor.
• Se hai IA, está declarada e hai control humano sobre o que xera.
• A app funciona sen conexión ou avisa con claridade de que a necesita.

Que facer se xa che rexeitaron

Le o motivo enteiro, non o titular: adoitan citar o punto exacto das súas normas e ás veces achegan unha captura. Corrixe só iso, responde no mesmo fío explicando que cambiaches e volve enviar. Se cres que se equivocaron, pódese pedir revisión —ambas as tendas o permiten—, pero téñeo claro: cando o motivo é que a app achega pouco, discutir rara vez funciona; o que funciona é darlle á app unha razón de existir.

Preguntas frecuentes

Cantas veces podo reenviar?

As que precises, non hai penalización por tentalo de novo. O que se acumula é o tempo.

Rexeitan máis en Apple ca en Google?

Apple rexeita máis e por motivos máis subxectivos. Google rexeita menos na primeira revisión pero é implacable coas políticas de datos e pode retirarche a app despois se detecta un incumprimento.

Pódenme retirar a app unha vez publicada?

Si, e pasa. Por incumprir políticas novas ou por non actualizar ao nivel mínimo do sistema que esixen cada ano.

Guías relacionadas

• Canto custa facer unha app, co desglose por fases e o custo de mantela.
• Apps a medida, que entra e que non nun proxecto.