App ou web: que precisa de verdade o teu negocio

Consultoría EHERO

5 minutos de lectura

A dúbida app ou web resólvese case sempre igual: cunha web. Dígoo nós, que desenvolvemos aplicacións, porque a maioría das ideas que nos chegan como «quero unha app» resólvense mellor —e bastante máis barato— cunha páxina ben feita. Pero hai casos nos que a app non é un capricho senón a única opción. Imos separar uns doutros.

A pregunta que o decide

Non é «¿que queda mellor?» nin «¿que teñen os meus competidores?». É esta: ¿a persoa vai usar isto moitas veces, ou unha?

Unha app vive na pantalla de inicio dun móbil, e ese sitio gáñao algo que se abre a miúdo. Se o teu cliente vai entrar dúas veces ao ano, non vai instalar nada: buscará en Google e entrará polo navegador. Instalar é unha barreira enorme, e só se cruza cando compensa.

Cando a web é a resposta correcta

Queres que te atopen. As apps non saen en Google. Se o teu problema é visibilidade, unha app non o resolve: empeórao, porque metes o contido onde ninguén o busca.
Ensinas un catálogo ou vendes online. Unha tenda funciona perfectamente no navegador do móbil, e quen che compra dúas veces ao ano xamais instalará nada.
Captas contactos ou orzamentos. Un formulario nunha web ben feita converte igual e custa unha fracción.
Necesitas cambiar cousas a miúdo. Na web publicas e xa está. Nunha app, cada cambio pasa pola revisión de dúas empresas.
O orzamento é axustado. Co que custa a app máis barata tes unha web excelente e orzamento de sobra para traer visitas.

Cando a app si compensa

Uso diario ou semanal. Un equipo que ficha, reparte ou inspecciona todos os días. A fricción de abrir o navegador e escribir a dirección, multiplicada por 200 días, é real.
Fai falta funcionar sen cobertura. Almacéns, obras, estrada, sotos. Unha app garda o traballo e sincronízao ao recuperar sinal; unha web, non.
Avisos push que hai que ver. Un pedido novo, unha incidencia, un turno. O correo ignórase; a notificación do móbil, non tanto.
Usa o móbil de verdade. Cámara para escanear códigos, GPS en segundo plano, lector NFC, biometría.
O produto É a app. Se o que vendes é a aplicación —por subscrición, compras ou publicidade—, non hai debate.

Comparativa rápida

Custo inicial	Web: bastante menor. App: desde uns 5.000 € e subindo segundo pantallas e servidor.
Custo de manter	Web: moderado e estable. App: obrigatorio, porque Android e Apple soben requisitos cada ano.
Visibilidade en Google	Web: é o seu terreo. App: nula; hai que traer as descargas por outro lado.
Publicar cambios	Web: ao momento. App: revisión da tenda polo medio.
Sen conexión	Web: moi limitado. App: é unha das súas razóns de ser.
Avisos push	Web: posible con limitacións, sobre todo en iPhone. App: nativo e fiable.
Barreira de entrada	Web: un clic. App: descargar, instalar e ás veces rexistrarse.

A terceira opción que case ninguén formula

Existe un punto intermedio: unha web que se pode «instalar» no móbil e funciona parcialmente sen conexión, o que se coñece como aplicación web progresiva. Sae moito máis barata ca unha app nativa, actualízase sen pasar por ningunha tenda e segue aparecendo en Google.

Non a vende case ninguén porque factura menos, así que convén dicilo: os seus límites están no acceso ao hardware e nas notificacións en iPhone, que van por detrás. Para moitos casos internos é máis que suficiente.

Como decidilo en cinco minutos

Respóndete a estas catro e terás a resposta:

¿A mesma persoa vai usalo máis dunha vez por semana? Se non, web.
¿Necesita funcionar sen cobertura ou usar cámara, GPS ou NFC? Se si, app.
¿Queres que te atopen buscando? Web, sempre.
¿O produto que vendes é a propia aplicación? App, sen debate.

Se che saen respostas mesturadas, o habitual é empezar pola web e engadir a app cando o uso o xustifique. Ao revés case nunca sae ben.

Preguntas frecuentes

¿Podo converter a miña web en app?

Meter a web nunha xanela e publicala como app é xusto o motivo polo que Apple rexeita centos de aplicacións. Outra cousa é reaproveitar o servidor e os datos da web, que si se fai e abarata moito o proxecto.

¿E se a miña competencia ten app?

Mira se a xente a usa antes de copiala. As tendas mostran as valoracións e o número aproximado de descargas: moitas apps de empresa publicáronse, ninguén as instalou e aí seguen sen actualizar.

¿Necesito as dúas cousas?

É o normal cando a app ten sentido: a web para que te atopen e expliquen quen es, e a app para o uso repetido de quen xa é cliente. Cada unha fai o seu.

Se despois disto segues pensando que o teu é unha app, en apps a medida tes como traballamos, que entra e que custa. E se cres que é unha web, mira os nosos servizos: dirémoscho igual de claro na primeira resposta.